Petición de contribuciones (revista)

Estimaes y estimaos colegues, collaboradores y llectores:

Préstanos informar de que Lletres Asturianes (LLAA) tien abierta la convocatoria de trabayos orixinales pal so númberu 128 (marzu 2023). Nesti númberu tendrán acoyida los trabayos inéditos (máx. 25 páxines A4 con interlliniáu cenciellu) que nun tean publicaos con anterioridá nin en procesu d'evaluación n'otres revistes.

El plazu pal unviu d'artículos acaba'l 22 de xineru de 2023.

Lletres Asturianes asoleya trabayos científicos orixinales que tengan como oxetu del so estudiu la llingua y la lliteratura asturianes, entendíes nun sen ampliu y na so rellación col ámbitu hispánicu y románicu. Del mesmu mou, amiesta tamién otros trabayos de calter antropolóxicu, pedagóxicu y sociollinguísticu, enfotaos toos ellos na meyora de la conocencia, la problemática y la normalización de la llingua asturiana. 

Los artículos susceptibles de publicación han d'unviase en llinia al traviés de REUNIDO, la plataforma de revistes científiques de la Universidá d'Uviéu, https://reunido.uniovi.es/index.php/Lletres/about/submissions, siguiendo siempres les direutrices y normes de publicación de la revista que s'axunten nel enllaz anterior.

Los artículos que s'aceuten tres d'una evaluación per pares ciegos espublizaránse na seición “Trabayos d'investigación”. Sicasí, LLAA tamién tien abiertes a los y les autores les seiciones “D'otramiente”, onde tienen cabida artículos de mena diversa que nun precisen de tener la cadarma metodolóxica y conclusiva de los trabayos d'investigación nin de pasar per un sistema d'evaluación esternu, namás editorial, y “Reseñes bibliográfiques”, onde se receicionen reseñes d'obres d'investigación en o sobre l'asturianu.

La llingua principal ye l’asturianu, pero podrán asoleyase trabayos escritos n’otres llingües.